CHARLA. OS SEGREDOS DAS BURGAS, ANDRÉS POMBO

Este mércores, 4 de decembro, xa rematados os exames, Andrés Pombo achegouse ao noso centro para falar cos rapaces de 3º da ESO sobre O segredo das Burgas, o seu primeiro libro publicado aínda non hai un ano.

O autor presentou brevemente aspectos da creación literaria como a orixe da súa afección por escribir, libros que lle influíron, fontes empregadas para a documentación… para dar protagonismo ás preguntas do alumnado que aproveitou a oportunidade lanzando unha chea de cuestións ao escritor. Logo da sinatura de libros, Andrés serviu de guía a un dos grupos pola zona vella da cidade. Ao longo do roteiro, completou a información e continuou contestando preguntas sobre un Ourense que moitos dos nosos alumnos e alumnas estaban descubrindo.

Mañá, xoves, 5 e o luns, 9, volverá guiar aos dous grupos que quedan polo Ourense das Burgas e das lendas.

Por todo isto, agradecemos á editorial Galaxia e concretamente ao seu representante, que tamén nos acompañou, a atención e facilidades brindadas. E, como non, reiteramos o noso agradecemento a Andrés polo tempo adicado, a súa disposición, proximidade e sinceridade. 

Desexámosche moitísima sorte co teu vindeiro libro que agardamos con impaciencia.