O Museo Arqueolóxico Provincial de Ourense rinde homenaxe ao Padre Feijóo

Os alumnos de 4º de ESO puideron gozar esta semana na sala de exposicións do Centro Social Afundación (Praza Maior, 4) da exposición “O Padre Feijóo. Cidadán libre dá República Literaria".

A mostra presenta catro ámbitos temáticos. O primeiro aborda a cuestión da súa biografía. Persoa de resonancia universal, o Padre Feijóo era natural de Ourense, membro dunha familia fidalga con raizame en diferentes lugares da provincia. Despois de Ourense virán novos lugares e a carreira formativa para chegar ao asentamento definitivo en Oviedo.

O apartado destinado á análise da súa obra pretende expoñer a profunda renovación que realizou Feijoo do pensamento do seu tempo, un escritor filosófico, fóra de toda norma como este se definía: "Cidadán libre da República Literaria". Esta produción pode poñerse en relación coa Ilustración e cos seus contemporáneos pero igualmente proxectarse no presente, faceta do seu legado que se pretende subliñar.

Como lugar de orixe de Feijóo, Ourense rendeu homenaxe en datas sinaladas á súa figura e son fitos na recuperación da súa figura no século XIX. Destacan dous actos de eco nacional: a celebración do bicentenario do seu nacemento en 1876 e as festividades con motivo da inauguración da súa estatua en 1887.

                Estas son algunhas das imaxes dos nosos alumnos gozando do museo.